བསིལ་ཆབ།
སྔོ་ལྗང་རྩྭ་ལོས་མུ་ཏིག་རྒྱན་ཆ་སྤྲས།།
ལྗོན་ཤིང་ཡལ་གས་ཡིད་འཕྲོག་བྲོ་གར་འཁྲབ།།
བྱེའུ་ཆུང་སྐྱིད་པའི་གླུ་དབྱངས་ཀྱུར་ཀྱུར་སྒྲོག །
ཞོགས་པའི་ཁ་དབུགས་སློབ་གླིང་འདི་ལ་ཁྱབ།།
ཟླ་འདིའི་ཚེས་ ༨ ཉིན་མདོ་སྨད་ཀན་ལྷོ་ཁུལ་འབྲུག་ཆུ་རྫོང་ཐོག་ཏུ་རི་ཉིལ་འདམ་ལུད་ཀྱི་དོན་རྐྱེན་ཆེན་པོ་ཞིག་བྱུང་སྟེ། མི་ ༧༠༠ ལྷག་འདས་གྲོངས་དང་མི་ ༡༠༠༠ ལྷག་བོར་བརླག མི་ ༥༠༠༠༠ ལྷག་ལ་དཀའ་ངལ་ཆེན་པོ་འཕྲད་བཞིན་ཡོད་སྟབས། ཕྱི་ཚེས་ ༡༠ ཉིན་རོང་ཆེན་བསྟན་པའི་སྒྲོན་མེ་བཀའ་ཟུར་ཀིརྟི་རིན་པོ་ཆེ་མཆོག་གིས་ཐུགས་གསོའི་འཚམ་འཕྲིན་བསྐུར་གནང་མཛད་ཡོད།
མི་སྣ་འབྲི་ཚུལ། བོད་ཁྱིམ་གོ་པལ་པུར་བོད་ཁྱིམ་ནས།
ངའི་ནུ་མོ་གཟུགས་མི་ཆེ། གདོང་སྒོར་སྒོར་ཡིན་ལ་མིག་གཉིས་ཧ་ཅང་ཆེ། སྨིན་མ་འཇའ་ལྟར་གུག་པ་དང་སྐྲ་ཁམ་ནག་ཡིན། མགོ་ན་རི་བོང་གི་རྣ་གཤོག་ལྟ་བུའི་ཐོར་ཅོག་གཉིས་ཡོད་པ་དང༌། དེ་ལ་ལིང་དམར་པོའི་མེ་ཏོག་ཅིག་མདུད་ཡོད། ལམ་དུ་འགྲོ་དུས་སུ་ཡར་རྒྱུག་མར་རྒྱུག་དང་གནམ་ལྡིང་ས་ལྡིང་བྱས་ནས་འགྲོ། མོ་མཛེས་ཤིང་སྡུག་པའི་ཕྱེ་མ་ལེབ་ཅིག་དང་འདྲ།
ནུ་མོ་རིག་པ་བཟང་ཞིང་རྩེ་དགའ་ཆེ་བས་དུུས་ཚོད་སྐར་མ་གང་ལ་ཡང་འདུག་མི་བཟོད། བྱིས་བཅོལ་ཁང་དུ་ཞུགས་རྗེས་ནུ་མོ་སློབ་སྦྱོང་བྱེད་པར་དགའ་བར་གྱུར། ཁྱིམ་དུ་ངས་ལས་བྱ་འབྲི་བའི་དུས་སུ་མོས་ཀྱང་རང་གི་འབྲི་དེབ་བླངས་ནས་ནན་ཏན་གྱིས་ཡི་གེ་འབྲི་བ་རེད།
ཀླུ་སྨྱོན།
ལོ་ངོ་ཁྲི་ཕྲག་གི་ཕ་རོལ་ནས་དེ་རིང་བར་དུ།
མི་རིགས་འདིས་རང་ལམ་རང་གིས་བཙལ་ནས་ཡོང་བ་ཡིན།
ལྷ་དང་དཀོན་མཆོག་གི་འདུ་ཤེས་ཀྱིས།
མི་རིགས་འདི་ལ་སེམས་གསོ་གྲངས་མེད་ཅིག་སྦྱིན་ཡོད།
ཆོས་དང་རིག་གཞུང་གི་གཞུང་རྟ་ཡིས།
མི་རིགས་འདི་ལ་ལྗིད་ཏིག་ཏིག་གི་སྟོན་འབྲས་ཤིག་བསྩལ་ཡོད།
ཡིན་ན་ཡང་།
མི་རིགས་འདི་དཀའ་སྡུག་དང་འཕྲད་དུས།
མི་རིགས་འདིའི་ཐག་ཉེ་ས་ན་ཡོད་པའི་མགོན་སྐྱབས་ནི།
མི་རིགས་འདི་རང་ཉིད་ཁོ་ན་ཡིན།
མི་རིགས་འདི་བདེ་སྐྱིད་དང་ལྡན་དུས་སུ།
མི་རིགས་འདིའི་གླུ་སྒྲ་མགོ་མ་དེ་གྱེར་མཁན་ནི།
མི་རིགས་འདི་རང་ཉིད་ཁོ་ན་ཡིན།
མཐའ་དམག་གི་འཇིགས་པ་བསླེབས་དུས།
མི་རིགས་འདིས་རང་གི་གསོན་ལམ་ཞིག་བཙལ་ཡོད་ལ།
གློ་བུར་བའི་ས་ཡོམ་བརྒྱབ་དུས་ཀྱང་།
མི་རིགས་འདིས་རང་གི་འཚོ་གནས་ཤིག་རྙེད་ཡོད།
ང་རང་བོད་པ་ཞིག་ཡིན་བསམས་པའི་འདུ་ཤེས་གསོན་པོ་ཞིག་ཁོ་ནས།
ད་གཟོད་མི་རིགས་འདི་འཆི་ལམ་ནས་ཕྱིར་འཇིག་རྟེན་དཀར་ངོགས་སུ་ཁྲིད་ཡོང་བ་དང་།
ང་རང་གངས་ཅན་པ་ཞིག་ཡིན་སྙམ་པའི་ང་རྒྱལ་དྲག་པོ་ཞིག་གིས།
ད་གདོད་མི་རིགས་འདི་མུན་ཁྲོད་ནས་འོད་ཟེར་གྱི་ཀློང་དུ་བསྐྱལ་ཡོང་བ་ཡིན།
འདི་དང་འདི་ལྟ་བུའི་དཔུང་གདང་གཅིག་སྒྲིལ་གྱི་གླུ་སྒྲ་ཞིག་གྲག་ཐེངས་རེ་རེར།
ངའི་སྙིང་དམར་པོ་དེའི་ཚ་དྲོད་མཐོ་ནས་མཐོ་རུ་འགྲོ་བ་དང་།
འདི་དང་འདི་ལྟ་བུའི་རྡོག་རྩ་གཅིག་སྒྲིལ་གྱི་གོམ་སྟབས་ཤིག་སྒྲིག་ཐེངས་རེ་རེར།
ངའི་མ་འོངས་པའི་རེ་བ་ཡང་ལྕི་ནས་ལྕི་རུ་འགྲོ་གིན་འདུག
གཤིན་པོ་ཚོར་བསྔོ་སྨོན་འདོན་དུས།
སྐྱ་སེར་མེད་པར་དེ་རིང་མཉམ་དུ་འཛོམས་འདུག་ལ།
གསོན་པོ་ཚོར་རོགས་རམ་བྱེད་དུས་ཀྱང་།
དབུལ་ཕྱུག་མེད་པར་དེ་རིང་ལྷན་དུ་འདུས་པས།
མི་རིགས་འདི་ད་ནི་ལོ་ངོ་སྟོང་ཕྲག་གི་རྨི་ལམ་མཐུག་པོ་ཞིག་ལས་ཡོངས་སུ་སད་དེ།
མི་རིགས་འདི་ཆོལ་ཁ་དང་ཆོས་ལུགས་ཀྱི་ཕྱོགས་རིས་ལས་ཡོངས་སུ་བརྒལ་ཏེ།
རང་ངོ་རང་གིས་ཤེས་ཤིང་རང་མིར་རང་གིས་གཅེས་པའི་དུས་རབས་ཤིག
དེ་རིང་ནས་མགོ་བརྩམས་འདུག་པ་ཡང་གཞི་ནས་རྟོགས་བྱུང་།
སྐྱེ་རྒུའི་ས་ཡོམ་གྱི་དགུང་ཞག་ཚང་བའི་ཉིན་མོར་ཨ་རིར་བྲིས།
August 15th, 2010 | Tags: 
མཆན་མང་ཤོས་ཀྱི་རྩོམ།