ཚད་ལྡན་གྱི་དགེ་རྒན་ལ་དཔྱད་པ།

 ཧ་པ་སྤུར་དབུས་བོད་སློབ་ཀྱི་བོད་ཆོས་ཟུང་དགེ་དགེ་བཤེས་བློ་ལྡན་ནས།

དེང་སྤྱི་ཡོངས་ནས་བོད་རིགས་སློབ་གྲྭ་ཁག་གི་ཤེས་ཡོན་ཉམས་ཆག་ཕྱིན་དང་འགྲོ་བཞིན་པར་དངངས་ཚབ་ཀྱིས་བསམ་ཚུལ་འདྲ་མིན་ཇི་སྙེད་ཅིག་གཅིག་མཇུག་གཉིས་མཐུད་བཏོན་དང་འདོན་བཞིན་པ་ནི་ཉུང་ངུ་ཞིག་ག་ལ་ཡིན།  དགེ་རྒན་ཡིན་མིན་ལ་མ་ལྟོས་པར་ཕྱོགས་གཉིས་ཀའི་བསམ་ཚུལ་ཐུན་སྣང་དུ་གྲུབ་པའི་འགྲུབ་དོན་ནི།  ད་ལྟའི་སྐབས་དང་སྔོན་ཕྱི་ལོ་དྲུག་ཅུ་ནས་བརྒྱད་ཅུའི་མཚམས་སུ་བོད་རིགས་སློབ་གྲྭ་ཁག་སོ་སོའི་ནང་དུ་དགེ་རྒན་ཚད་ལྡན་ཇི་སྙེད་ཅིག་མཆིས་པའི་གྲངས་ཚད་གཉིས་བསྡུར་ན་གནམ་ས་བླ་འོག་གི་འགྱུར་ལྡོག་ཕྱིན་ཏེ།  ད་ཆ་གང་ཟག་གང་ཞིག་གིས་འབད་པ་བརྩལ་དུ་སྟོན་ཏེ་དགེ་རྒན་ཚད་ལྡན་ཞིག་འཚོལ་ཚེ་ཉིན་མོའི་སྐར་མ་ལྟར་ཆེས་ཉུང་ངུ་ཞིག་ལས་མི་སྣང་ལ་མངོན་པ་དག་ཀྱང་རྒྱུ་རྐྱེན་དུ་མའི་དབང་གིས་འབྲི་བཞིན་པར་ཡང་འདོད་དོ།།

       མང་པོ་ཞིག་གི་ངག་ནས་ཕྱུང་བའི་དགེ་རྒན་ཚད་ལྡན་ཞེས་པ་དེའི་དོན་ཅི་འདྲ་ཞིག་འཇོག་དགོས་པ་དང་ཚད་ཇི་ཙམ་ཞིག་ལོང་དགོས་པ་དེ་ནི་བདག་གིས་བསམ་ཚོད་ཀྱིས་འཆད་འདོད་པའི་གནད་དོན་འགངས་ཆེ་བ་ཞིག་ཡིན།  དེ་ལ་དང་པོ་སྤྱིར་དགེ་རྒན་ཚད་ལྡན་ཞེས་པ་ནི།  ཤེས་ཡོན་སྤྲོད་ཐབས་ལ་མཁས་པ་གང་ཞིག་སློབ་ཁྲིད་ཀྱི་བྱ་བར་ངང་གིས་སྤྲོ་བ་བརྟས་ཤིང་རྣམ་འབྱེད་ཀྱི་ཤེས་རབ་དང་ལྡན་པ་ཞིག་ལ་གོ་དགོས་པར་སེམས། 

གཉིས་པ་ཚད་ལྡན་གྱི་དགེ་རྒན་དེ་ཚད་ཅི་འདྲ་ཞིག་ལོང་དགོས་སམ་ཞེ་ན།  རང་གི་སློབ་མ་ལས་ཡོན་ཏན་ལྷག་པ་དང་ལྡན་པ། 

ཁྲིད་བྱའི་སློབ་ཚན་གྱི་བརྗོད་བྱེད་ཚིག་གི་དོན་རྣམས་ཡང་དག་པར་རྟོགས་པའི་སྤོབས་སེམས་ལྡན་པ།  བརྗོད་བྱེད་ངག་གི་སྒྲ་དག་ཅིང་གསལ་ལ་སློབ་མའི་རང་ཁམས་དང་བསྟུན་ཏེ་འཁྲིད་མཁས་པ།  སློབ་མས་དྲི་བ་ཇི་འདྲ་ཞིག་འདོན་ཡང་སྐྱོ་ངལ་མེད་པར་དང་ལེན་བྱེད་དཔའ་བའི་རང་བཞིན་དང་ལྡན་པ།   ཕྱི་ལུས་ངག་གི་སྤྱོད་ཚུལ་རྣམས་ཡིད་དུ་འཚམ་ཞིང་བཀུར་འོས་ཀྱི་རང་བཞིན་དང་ལྡན་པ། རང་ཉིད་རྟག་ཏུ་རིག་གནས་སློབ་པར་སྤྲོ་བས་འབུང་ཞིང་གཞན་སློབ་མར་ཤེས་ཡོན་སློབ་གསོ་སྤྲོད་ཐབས་མཁས་པ།   རང་དགེ་རྒན་ཡིན་པ་གསལ་པོར་ངོས་འཛིན་ཏེ་རྟག་ཏུ་ཚུལ་ཁྲིམས་ཀྱི་སྤྱོད་ཚུལ་ལ་གནས་པ།  གཡོ་ཟོལ་སྤངས་ཏེ་ཡིད་དྲང་ལ་སྨྲ་མཁས་པའི་སྒོ་ནས་སློབ་མ་འདུལ་སྦྱོང་ཐུབ་པའི་རང་བཞིན་དང་ལྡན་པ་བཅས་ནི།  ཚད་ལྡན་དགེ་རྒན་ཞིག་ལ་ཆ་མཚོན་ན་མེད་དུ་མི་རུང་བའི་དགོས་ངེས་ཀྱི་ཆ་རྐྱེན་རྣམས་ཡིན།  

         གོང་གསལ་ཚད་ལྡན་དགེ་རྒན་གྱི་ཆ་རྐྱེན་དེ་དག་ནི་སྤྱིར་དེང་གི་དུས་སུ་ཤེས་ཡོན་རྭ་བའི་ཁོར་ཡུག་ཏུ་རང་གི་སློབ་མ་དང་ལྷན་དུ་རྟག་ཏུ་འགྲོགས་པའི་དགེ་རྒན་ཡོད་ཚད་ལ་ཁྱབ་པའི་མཐུན་མོང་བའི་ཁྱད་ཆོས་ཞིག་ལས་ཐེག་ཆེན་གྱི་གཞུང་ནས་བཤད་པའི་དགེ་རྒན་གྱི་མཚན་ཉིད་བཅུ་དང་ཕྱོགས་ཡོངས་ནས་གཅིག་མཚུངས་ཤིག་མ་ཡིན།  དེས་ན་ཤེས་ཡོན་སློབ་སྦྱོང་བྱ་ཡུལ་བསྟི་གནས་གང་ཞིག་ཏུ་ཁྱད་ཆོས་དེ་ལྟ་བུ་ཚང་བའི་དགེ་རྒན་ཇི་ཙམ་མང་བ་དེའི་ཚོད་ཀྱིས་ཤེས་ཚད་ལོང་བའི་སློབ་མ་ཡང་གྲངས་ཀྱིས་མི་ལངས་བ་སྐྱེས་སྲིང་བྱེད་ཐུབ་པ་ནི།  ཚད་མའི་གཞུང་ལས།  མ་ཚང་མེད་རྒྱུ་དེ་ལ་ནི།  འབྲས་བུ་གང་གིས་ལྡོག་པར་བྱེད།  ཅེས་གསུངས་པ་ལྟར་རྒྱུ་རྐྱེན་རྟེན་འབྲེལ་ཚང་བའི་ཆོས་ཉིད་ཀྱི་སྟོབས་ཀྱིས་བྱུང་བ་ཞིག་ཡིན་པས་ཚན་རིག་གི་ལྟ་གྲུབ་དང་ཡང་ཕྱོགས་ཀུན་ནས་མཚུངས་པ་ཉིད་དོ།།  །།  

July 25th, 2010 | Tags: བསིལ་ཆབ་ཀྱིས། | རྩོམ་གྱི་རིགས།: དཔྱད་རྩོམ།